Ooo, Blendi, Blendi! Emër i njohur, fytyrë e “rehabilituar”, si ato pallatet e vjetra që i veshin me fasadë, por brenda… aman-aman! Na e solle ti kjo çorbë politike, aq e trashë sa as lugë të madhe nuk zë, e aq e hidhur sa të lë shije pas. Dikur student, dhjetorist i “flaktë”, pastaj nënkryetar bashkie, e tani, ministër! Bravo, Blendi, na e tregove si bëhet “karriera” në këtë vend, ku uji shkon përpjetë e ku përgjegjësia noton si peshku në ujë… të përmbytur.
Po, po, kujtojmë ne, Tirana ish-kryeqytet i përmbytjeve, me miliona euro dëme, e ti Blendi, si kapiten anijeje që e braktis kur mbytet, more arratinë drejt Greqisë. Biznese, qejfe, e Tirana le të lahej në baltë e zhgënjim. Kush u kujtua pastaj? Ama, populli ynë, me atë memorie peshku të artë që ka, të voton sërish. Jo thjesht të voton, por të bën “njeriun më të votuar të PS-së”! Po si?! Si, o Blendi, ia del ti të jesh kaq popullor, kur lajmet zhurmojnë për lidhje me grupe kriminale në Vorë e ku ta di unë, e ku tentakulat e tua kapin votën, krimin, biznesin, e çdo gjë që lëviz në këtë vend? Mister! Ndoshta ke gjetur recetën e suksesit: një pjesë amnezi kolektive, dy pjesë injorancë e lumtur, dhe një pjesë premtim bosh!
Inceneratorët dhe Gjumashi Dritan: Një Përrallë pa Fund (e pa Fajtorë)
Ah, inceneratorët! Kjo sagë epike, më e gjatë se “Lufta dhe Paqja”, dhe më misterioze se “Sherlock Holmes”. Dhe në qendër të saj, kush është? Po Blendi Gonxhja, si një prej yjeve në atë konstelacion. Kompania e familjarëve të tij, “Albarent”, merrej me qira makinash. Dhe kush i merrte makinat? Po “Integrated Energy” e Klodian Zotos dhe Mirel Mërtirit, kompania e inceneratorit të Tiranës. Dhe këto makina, o popull, jo për të transportuar mbetje, jo! Por për fushatën e PS-së në 2021-shin, dhe për Bashkinë e Tiranës.
Skema e qartë, si uji i pisët i Tiranës: Inceneratori merrte makinat me qira nga bashkëshortja e Blendit, me miliona lekë, pastaj këto makina i jepeshin Bashkisë së Tiranës falas. Dhe Bashkia, me këto mjete “falas”, rrinte vërdallë, kapte bizneset, ua çonte dherat në landfillin e inceneratorit. Një rreth vicioz, ku paratë rrotulloheshin e rrotulloheshin, dhe në fund, kush i paguante? Po ne, të dashur taksapagues, ne me rrogat tona modeste dhe çmimet e fryra.
Dhe këtu hyn në skenë Dritan Prençi, prokurori i SPAK-ut. Ky Dritani ynë, duket sikur ka rënë në një gjumë letargjik mbi dosjen e inceneratorëve. E shohin të gjithë, mediat shkruajnë, fakte pafund, dokumente, pagesa, skema… po Dritanit tonë s’i shkon syri! Vallë është i paaftë? Apo fle mbi sofrat e oligarkëve, si i përrallave me gjumë? Ndërkohë që Lefter Koka merr “dorezat e boksit” dhe shpallet fajtor, Erion Veliaj del i larë si dita, dhe Blendi Gonxhja… askush s’e heton! Paratë nga kompania e inceneratorit i ka marrë, bashkëshortja pronare e firmës së qiradhënies, e prapë, “gjumi” i Prençit vazhdon.
Beteja e Madhe e Blendi Gonxhes: Bashkia apo SPAK-u?
Pas rezultateve të zgjedhjeve, Blendi Gonxhja, i entuziazmuar si dhëndri ditën e martesës, paska shkruar në grupin e tij: “Kjo ishte një fitore. Përgatituni për një garë edhe më të madhe.” Dhe kjo, të dashur miq, na lë në dilemë. Cila është kjo garë e madhe?
- Gara e parë: Bashkia e Tiranës? Njeriu më i votuar, me tentakula të shtrira kudo, me një eksperiencë të thellë në “menaxhimin” e përmbytjeve, dhe me një lidhje “organike” me inceneratorin, pse jo? Kryeqytetari i ardhshëm i betonit dhe baltës.
- Gara e dytë: Beteja me SPAK-un dhe prokurorin Dritan Prençi? Kjo është gara vërtetë epike. A do të vazhdojë Dritani të “flejë” mbi dosjen, duke e kthyer një aferë qindra milionëshe në një “çështje qesharake” për disa zyrtarë të vegjël? Apo do të zgjohet, si i dehur nga gjumi, e do të shohë fakte, prova, dhe emra të mëdhenj si ai i Blendi Gonxhes?
Në këtë sallatë politike, ku dhelprat bëjnë ligjin, gjelat flenë gjumë, e populli vazhdon të gëlltisë çdo gjë, na mbetet vetëm të presim. Kush do të fitojë në fund? Ligji, apo ai “rregulli” i pashkruar që paratë dhe pushteti blejnë çdo gjë, madje dhe gjumin e prokurorëve?
Kjo është Shqipëria, ku satirën s’ke nevojë ta shkruash, e gjen të gatshme në çdo buletin lajmesh.
