Kam marrë lapsin dhe bllokun, por jo për të investiguar ndonjë aferë tjetër (sot jemi me pushim nga “e vërteta e hidhur”). Sot është një ditë e shënuar: Ditëlindja e Edi Ramës! Dhe si një gazetar komik investigativ, nuk mund ta lija pa i dedikuar disa rreshta, sepse siç e thotë populli: “Urime dhe fjalë të mira bëjnë zemrën e njeriut të lëvrijë!” (Sidomos kur vijnë nga ne, ata që gërmojnë thellë!)
Shumë njerëz thonë që vitet ndryshojnë njeriun. Por, me dorë në zemër dhe me batutën në majë të gjuhës, them: Vitet, o Edi, të kanë “shtuar oreksin”, jo të kanë ndryshuar! Ke mbetur po ai, MR 20 %
Të kujtohet kur thoje “ulja e çmimit të naftës”? Po ja, ai mbeti një urim për Ditëlindje, siç duket! Ose kur premtoje “Shqipëria do të bëhet”? Po bëhet, bëhet… ne ende po presim. Por kjo nuk është për të keq, se njeriu që pret gjatë, shijon më shumë! Apo jo?
Stili yt ka mbetur i paprekur: nga kostumet me ngjyra që vetëm ti di t’i veshësh pa u dukur si semafor, tek fjalimet epike që nisin me një mollë dhe mbarojnë me një yll në qiell. As flokët nuk të kanë ndryshuar shumë, duken po aq “artistikë” sa vitet e para. Dhe kjo është vërtet mbresëlënëse, sidomos për ne që na ra nga stresi i lajmeve që prodhon!
Mos harrojmë atë “më qafsh ti” legjendar, që tani është bërë pjesë e folklorit shqiptar. Një frazë që tregon thjesht dhe qartë se si lidhesh me popullin. Njësoj si fakti që në Ditëlindjen tënde, ne vazhdojmë të paguajmë çmime “europiane” për gjëra “shqiptare”. Kjo është e bukur, kjo është harmoni!
Pra, Edi, në këtë ditë të veçantë, ne të urojmë edhe 100 të tjera! Dhe shpresojmë që vitet e ardhshme të na japin më shumë material për të qeshur… ose për të qarë, varet nga perspektiva! Por e rëndësishme është të jemi shëndoshë e mirë, që të mund të vazhdojmë të ndjekim “transformimet” e tua!
Gëzuar Ditëlindjen, Kryeministër! Dhe mos harro: gazetarët satirikë janë si fëmijët, të themi të vërtetën në sy, por me dashuri (dhe shumë batuta)! Shpresojmë që dhurata jote e preferuar sot të jetë një paqe e vogël nga “investigimet” tona, por vetëm për sot! Nesër vazhdojmë nga e para!
